Nunami aalisakkanik suliffissuit
Aalisakkat kalaallinit pisarineqartut affaasa missaat sinerissami tunitsivinni suliarineqartarput. Pisarineqartut allat aalisariutini suliarineqartarput imaluunniit avammut tunisassiarineqartarput suliarisassanngorlugit. Aalisakkat nunami aalisakkanik suliffissuarni suliarineqartussat amerlanersaat sinerissap qanittuani aalisartunit pisuupput.
Raajanik avataasiorlutik aalisartut pisamik 25 pct.-iinik nunamut tunisinissamik pisussaaffeqarput, sinneri angallami tunisassiarineqarsinnaasarput. Aalisarnernut allanut akuersissutinik tunniussinermi nunami tunisinissamut aamma piumasaqartoqarsinnaavoq. Soorlu tamanna atuussinnaavoq avataasiorlutik qaleralinniartunut akuersissutinik tunniussinermi.
Nunami aalisakkanik suliffissuit pingaartumik pigineqarput Namminersorlutik Oqartussat ingerlatseqatigiiffiinit Royal Greenland A/S-imit aamma namminersorluni pigineqartumit Arctic Green Food A/S-imit. Taamaattorli ukiuni kingullerni suliffeqarfinnik namminersortunik pilersitsisoqarsimavoq, namminneq illoqarfimminni tunisassianik pisisartunik suliaqartartunillu. Taakku annertunerusumik tulliuttumik allaaserineqarput.
Royal Greenland A/S
Royal Greenland A/S suliffeqarfiuvoq Kalaallit Nunaanni annerpaaq. 2011-ip naalernerani ingerlatseqatigiiffik Kitaani illoqarfinni nunaqarfinnilu 20-nik suliffissuaateqarpoq. Ingerlatseqatigiiffiup kilisaatit raajarniutit arlalippassuit pigisarai. Kalaallit Nunaanni suliffissuit saniatigut Royal Greenland A/S-ip ataaniippoq ingerlatseqatigiiffik Royal Greenland Seafood A/S Danmarkimi, Norgemi, Tysklandimi, Polenimi Canadamilu suliffissuarnik pigisaqartoq nunani allani Danmarkimilu niuerfinnut atatillugu tuniniaanermut allaffeqarpoq.
Arctic Green Food A/S
Arctic Green Food A/S ingerlatseqatigiiffiuvoq Namminersorlutik Oqartussanit pigineqartumit KNI A/S-ip ataaniisimasoq. Ingerlatseqatigiiffik nunaqarfinni suliffissuaaqqanik kiisalu illoqarfinni tunitsivinnik amerlanngitsunik ingerlataqarpoq. Juuni 2007-mi Arctic Greenfood namminersortunik pigineqalerpoq, tassa sulisut namminneq ingerlateqatigiiffik pigilermassut.
Tunitsiviit namminersorlutik ingerlattut allat
Tunitsiviit namminersortumik ingerlanneqartut anginerit makku taaneqarsinnaapput:
- Polar Raaja, annertunerpaamik raajanik pisiortortoq.
- Arctic Prime Produktion, annertunerpaamik saarullinnik pisiortortoq.
- Kiisalu Upernavik Seafood, annertunerpaamik qaleralinnik pisiortortoq.
Titartagaq 1
Aalisakkanik aalajangersimasunik tunisineq
Malugiuk: 2009-mi aamma 2010-mi kisitsisit kisitsisaagallartutut nalunaagaapput.
Najoqqutaq: Naatsorsueqqissaartarfik
Aalisakkat aalajangersimasut tunineqartut amerlassusaat Titartakkami 1-mi takuneqarsinnaapput. Tunineqartut amerlassusaat aalisakkat amerlanerit eqqarsaatigalugit amerleriarsimapput raajat, qalerallit, saattussat, nipisaat saarulliillu qaammatikkaartumik tunineqartut Tabel 7-mi takuneqarsinnaapput.
Siusinnerusukkut tunisinermi akit Royal Greenland A/S-ip kattuffiillu (KNAPK aamma APK) aalisariutinut kilisaatinullu sullissisuusut akornanni isumaqatiginninniutigereernerisigut aalajangersarneqartarput.
Ukiut kingulliit ingerlaneranni aalisarnermit aalisakkanik qalerualinnillu pisisartut amerliartulersimapput. Tunisassianik pisinissamut unammilleqatigiinneq annertusineqarpoq akinullu pituttorsimannginnissaq ajornannginnerulerluni.
Titartagaq 2
Aalisakkat aalajangersimasut kiilumut akiisa allanngoriartornerat
Malugiuk: 2009-mi aamma 2010-mi kisitsisit kisitsisaagallartutut nalunaagaapput. Tunisat immikkoortut kiilumut akii agguaqatigiissitaapput. Allannguutit maluginiakkat peqquteqarsinnaapput nioqqutissiap assigiinngitsutigut suliarineqarnerata allannguuteqarneratigut.
Najoqqutaq: Naatsorsueqqissaartarfik
Raajanut, qaleralinnut, saarullinnut, nipisanut saattussanullu agguaqatigiissullugu kiilumut akigitinneqartut ineriartornerat Titartakkami 2-mi takuneqarsinnaapput. Tunisinermi amerlassutsit nalingilu pillugit paasissutissat erseqqinnerusut Tabel 8-mi takuneqarsinnaapput.
Tabel 9-mi takuneqarsinnaapput tunisisut aningaasarsiaannut immikkoortillugit agguataarnerisa amerlasusaannut ineriartornerat. Soorlu takuneqarsinnaasoq tunisisut 1990-mi 5.025-init 2006-mi 3.441-inut appariarujussuarsimallutik. Appariarneq pingaarnermik pisimavoq tunisisartuni ukiumut 10.000 kr.-it ataallugit tunisisartuni.
Nittartakkat takuneqarsinnaasut:
Royal Greenland pillugu nittartagaq una takuuk: www.royalgreenland.com
Arctic Green Food pillugu nittartagaq una takuuk: www.arcticfood.gl